RECOMENDACIÓNS DE NADAL

 Ola amiguiños e amiguiñas!! Chega o Nadal e o tempo de vacacións. Un tempo máxico para soñar, compartir e gozar en familia. Dende a biblioteca animámosvos a compartir as lecturas en familia e descubrir historias inesquecibles.

Nas páxinas dos contos  agóchanse duendes, animais faladores, aventuras, curiosidades, quer fan rir, soñar e imaxinar. Coma sempre invitámosvos a vir a biblioteca en busca de contos sorprendentes, pero tamén deixamos estas recomendacións lectoras de Nadal para o voso tempo de lecer e descanso.

FELICES FESTAS!!

A petanca entra na nosa radio: unha entrevista moi especial a José e Miki do Club Petanca Bandeira

Ola amiguiños e amiguiñas!! Durante as últimas semanas, os nenos e nenas de 4º de primaria convertéronse en auténticos xornalistas e xornalistas deportivos. A través dunha pequena investigación, achegáronse a un deporte moi presente na nosa contorna: a petanca, e coñeceron de preto a historia e o traballo do Club Petanca Bandeira.

O resultado foi a preparación dunha entrevista, na que os nenos e nenas tiveron a oportunidade de falar directamente con José e Miki membros do Club Petanca Bandeira, un club histórico, con máis de corenta anos de traxectoria, que leva o nome da Bandeira por toda Galicia.

Durante a entrevista falouse da orixe do club, da importancia da amizade e do compañeirismo, dos adestramentos, dos torneos e tamén das emocións que se viven arredor deste deporte. O alumnado descubriu que a petanca non é só lanzar bólas, senón respecto, convivencia, paciencia e traballo en equipo.

Despois, todo o alumnado de primaira participou en pequenos obradoiros de petanca. Pronto os veremos no campo de Bandeira poñendo en práctica o aprendido.

Dende aquí queremos agradecer ao Club Petanca Bandeira a súa dispoñibilidade, a súa cercanía e o cariño co que acolleron as preguntas do noso alumnado. Grazas por axudarnos a aprender e por ser un exemplo de deporte, compromiso e comunidade.

PODCAST 25N

Ola amiguiños e amiguiñas"" A pasada semana celebramos o 25 N: Día Internacional da Eliminación da Violencia contra a Muller 

Un mural co lema "Florece e medra libre" e as cancións que nos dan a forza para facelo foron os pasos a seguir este ano. Tiñamos que rematar este traballo presentando estas cancións en Radio Garabullo e falando cunha pequeno representación de cada aula. As locutoras do podcast: Martina, Lola, Lucía e Henar de 5º. 

Infantil propuxo "Varre Vasoira" de Fillas de Cassandra.

1º de Primaria propuxo "A porta violeta" de Rozalén.

2º de Primaria propuxo "Vivir mi vida" de Marc Anthony

3º de Primaria propuxo "Que non mo neguen" das Tanxugueiras

4º de Primaria propuxo "Madre Tierra" de Chayanne

5º de Primaria propuxo "Son Muller" de Máis boas cas patacas

6º de Primaria propuxo "No dejaré de quererte" de Dani Fernández

Parabéns 27-11-25

 Ola amiguiños e amiguiñas!! Hoxe, dende a emisora de Radio Garabullo, volvemos a emitir para o comedor do cole. Da man de
Sabela, Hugo Otero, Vega e Martín de 4º demos comezo a unha nova etapa de "Parabéns á hora de comer e as novas do tempo de lecer". Aproveitamos para felicitar o aniversario a todo o alumnado, persoal do centro e familias colaboradoras do comedor nados nos meses de agosto, setembro, outubro e novembro. Queredes escoitalos?

FLORECE E MEDRA LIBRE COA MÚSICA

Ola amiguiños e amiguiñas!! Como xa sabedes entre todos escollemos unhas cancións fantásticas para celebrar o 25N. Todas elas seguindo o lema "Florece e medra libre". Cada clase tivo o seu motivo. Todas animan a seguir adiante con forza e así o sentimos o martes cando todos xuntos celebramos o 25N "Día Mundial da Eliminación da Violencia contra a Muller" .

25 N: FLORECE E MEDRA LIBRE

Ola amiguiños e amiguiñas!! Hoxe é o 25 de novembro Día Internacional da Eliminación da Violencia contra a Muller.

Este día serve para lembrar que todas as persoas debemos tratar ás demais con respecto, cariño e igualdade. As nenas e as mulleres teñen dereito a vivir libres, seguras e felices, e nós tamén podemos axudar a conseguir un mundo mellor sendo xustos, apoiándonos e falando sempre con respecto.

“Florece e medra libre”

Este ano, no cole todo o alumnado participou na creación dun mural moi especial

Baixo o lema “Florece e medra libre”, fixemos dúas flores enormes. En cada un dos seus pétalos escribimos letras de cancións que animan ás mulleres a florecer, crecer, ser fortes e confiar en si mesmas.

O mural lembra que, igual cas flores, todas as persoas necesitamos coidado, apoio e liberdade para medrar. Quedou precioso grazas ao traballo de todas as aulas!

Para acompañar esta conmemoración, dende a biblioteca recomendamos un conto moi especial: Maruxa de Eva Mejuto. É unha historia chea de simpatía e humor que nos fala do inxenio que ten Maruxa para acadar a igualdade. Un libro perfecto para ler en familia ou na aula. Aos compañeiros de 1º e 2º de primaria encantoulles!!

EN BANDEIRA PINTAMOS TODOS

Ola amiguiños e amiguiñas!! Hoxe tócanos felicitar aos compañeiros e compañeiras de 5º pola súa participación no concurso ""Canta y baila contra el bullying" convocado pola empresa Giotto e a Asociación Española contra o Acoso Escolar. Onte enterámonos de que gañaron na súa categoría e que participan na final do día 25 de novembro. 

Supoñemos que todos e todas queredes ver o vídeo gañador... Aquí volo deixamos. 

Ola amiguiños e amiguiñas!! Sabíades que o alumnado de 5.º participa no concurso “Canta y Baila Contra el Bullying”?

Pois si! O alumnado de 5.º de Primaria está a participar no concurso “Canta y Baila Contra el Bullying”, unha iniciativa que promove o respecto, a empatía e a convivencia positiva a través da música e da danza.

Para o certame, os nenos e nenas interpretaron e gravaron a canción “Aquí pintamos todos” na radio do colexio, unha experiencia moi divertida que esperta unha gran motivación en todo o grupo. Eles mesmos crearon a coreografía, demostrando a súa creatividade, a capacidade de colaboración e o compromiso coa mensaxe da canción.

Así foron gravando as distintas escenas do videoclip, que despois se montaron para dar forma ao resultado final. A ilusión foi tal que outros compañeiros e compañeiras do centro xa están aprendendo a canción, de tanto escoitala durante os ensaios, nos recreos e nos corredores do colexio.

Todo este proxecto xurdiu a raíz da charla que o alumnado tivo co escritor Eloy Moreno sobre o acoso escolar, unha experiencia que os fixo reflexionar e os animou a actuar. Desa inspiración naceu a súa participación no concurso, cunha mensaxe clara e chea de cor:

“Todos pintamos contra o bullying”.

GARABULLO PIDE AXUDA

Ola amiguiños e amiguiñas!! Onte pasou unha cousa moi especial. Garabullo foi curso por curso para facer unha proposta moi especial! Quere que todas e todos investiguemos e traballemos nun novo Proxecto Documental Integrado (PDI) que leva por título “Melloramos cando recuperamos”.

A mensaxe é clara: cando coidamos o que xa temos, cando recuperamos espazos e lles damos unha segunda vida, todos e todas melloramos: o cole, o medio ambiente, e tamén nós mesmos.

Os máis pequenos recibiron a misión de pensar e investigar como facer do patio un lugar máis bonito, máis divertido e máis verde. Observan, debuxan, propoñen e mesmo fan pequenas investigacións sobre plantas e xogos. Están demostrando que as grandes ideas tamén veñen de peques moi pequenos.

O alumnado de 1º e 2º está mergullado na recuperación do horto do cole. Queren devolverlle a vida:  limpar, preparar a terra, buscar información sobre as plantas e investigar como coidar o horto respectado a natureza. Xa están listos!! pensando en sementar… e para aprender mentres ven como medra todo.

Os nenos e nenas de 3º e 4º converteronse en auténticos exploradores. Saíron ao exterior para coñecer o Coto da Gaiteira, investigar a súa historia, a súa flora e fauna, e descubrir maneiras de coidar mellor este espazo natural tan importante para o noso entorno. Están preparando propostas de mellora para preservar este pequeno tesouro verde.

O alumnado de 5º e 6º asumiu un reto creativo: recuperar unha aula en desuso e transformala nun novo espazo útil para o cole. Están investigando modelos de aulas temáticas, buscando ideas de deseño, faranvos enquisas para elaborar plans de transformación. Moi pronto descubrirase en que se converterá… Promete ser algo marabilloso!

UNHA CHARLA MOI INTERESANTE ABRE O PERÍODO DE "LECTURA E FAMILIAS"

Ola amiguiños e amiguiñas!! O pasado mércores 12 de novembro o alumnado do 2º ciclo tivo  unha charla moi especial sobre os perigos das redes sociais, Internet e os xogos en liña.

O noso convidado, o papá de Laura e Lucía, explicounos o importante que é falar destas cousas xa desde que pequenos, xa que cada vez empezamos antes a usar móbiles e xogos online.

Durante a charla explicou o importante que é non compartir fotos, non falar con descoñecidos cando xogamos e ter sempre coidado co que compartimos en Internet.

Recordounos que, se algunha vez temos unha dúbida ou algo nos fai sentir incómodos, debemos contalo sen medo: aos nosos pais e nais, ás mestras e mestres, ou a calquera adulto de confianza. Internet pode ser un lugar divertido para aprender e xogar, sempre que o usemos con responsabilidade e acompañados.

Con esta fantástica charla, abrimos as portas da biblioteca, a todas as familias que queraides vir a contar un conto ou a facer pequenos obradoiros, ensinando e compartindo cos vosos pequenos as vosas habilidades.