AS NOVAS DA HORA DE COMER

Ola amiguiños e amiguiñas!! Despois das vacacións de Entroido a nosa radio, Radio Garabullo, volveu a emitir en directo para o comedor do cole. Como sempre Esther e Uxía contaron as novas do cole no seu programa semanal "As novas da hora de comer e curiosidades do tempo de lecer".

TRASDEZA PINTA O CAMIÑO

 O Alumnado de 6º curso do noso colexio participou ,este martes, na primeira fase do proxecto Trasdeza Pinta o Camiño. Estudiantes dos distintos centros do municipio participan nesta iniciativa para a promoción e dinamización da ruta Xacobea ao seu paso polo municipio tomando como referencia as artes plásticas.

Non deixedes de pasar pola páxina do cole (picade na foto) para ver toda a información desta actividade tan interesante. 

DESCUBRINDO A ROSALÍA

Ola amiguiños e amiguiñas!! O vindeiro mércores 24 de Febreiro é o "Día de Rosalía". Nestas datas, nas aulas, iremos coñecendo a figura de Rosalía de Castro e a súa obra.

É moita a xente que fai cousas fantásticas e marabillosas que comparte nas redes e das que todos e todas podemos aprender, o xogo que agora vos presentamos atopámolo na rede, e aproveitamos dende aquí para agradecer que tanta xente comparta os seu traballo.

É un recurso fantástico para coñecer a figura de Rosalía. Segundo amosedes o voso coñecemento da nosa homenaxeada iremos avanzando para chegar a nosa meta. Un reto moi interesante e divertido. Animádesvos?

DIGICRAFT

 Ola amiguiños e amiguiñas!! Continuamos coas nosas sesións de DIGICRAFT. Coma sempre aprendendo moito de realidade virtual e programación e coma non tamén traballando algo cos scornabots.

Ollade cantas cousas facemos nas nosas sesións.

Os nenos e nenas de 6 a 8 anos participaron en actividades coma "Personaxes de papel"

Outra actividade moi interesante e na que aprenderon moitas cousas de como clasificar os arquivos e as imaxes nos nosos ordenadores e tablets.

Os maiores decantáronse por actividades máis creativas. Estiveron creando os seus propios anuncios:

Foron tamén os maiores os que crearon pequenas historias para aprender moitas cousas relacionadas cos dereitos de imaxe e a propiedade dos contidos que colgamos en internet. Ademáis de divertirnos aprendemos moitas cousas fundamentais relacionadas con estes temas.

E sempre que podemos aproveitamos as nosas sesións para aprender de todo e experimentar con outros materiais. Nesta sesión aproveitamos para xogar e aprender cos escornabots...

O ENTROIDO NO CAMIÑO

Ola amiguiños e amiguiñas!! Xa chega o Entroido e como temos moitas gañas de saír decidimos facer o noso photocall diante da "Catedral de Santiago". Imaxinamos que eramos  peregrinos que celebran a súa meta con fermosas fotos e con moita festa...E así seguindo coa nosa imaxinación celebramos o noso propio Entroido na aula. Estabamos todos moi guapos e con moitas gañas de pasalo ben!! Queredes vervos pois dádelle a play!!

ALTO DOS XENERAIS INFANTIL

 Ola amiguiños e amiguiñas!! A pandemia quere parar os nosos proxectos pero nós somos un pouco cabezóns... Este ano non podíamos celebrar os V Encontros do Entroido pero os compañeiros de 6º non querían deixar o cole sen participar nun "Alto dos Xenerais". 

Aproveitando o patio de infantil e que moitas aulas dan a ese patio conseguimos crear un pequeno anfiteatro para poder gozar todos do Alto en primeira liña e mantendo os nosos grupos burbulla. Un xeito orixinal de ver o "Alto dos Xenerais infantil". O seguinte paso un compromiso de todos os participantes no Alto de crear as súas Arengas e preparalas ben preparadas, coma se realmente participáramos no "Alto dos Xenerais da Bandeira" ou nos "V Encontros do Entroido" e tamén o tivemos. Así que fíxose o Alto dos Xenerais Infantil do cole da Bandeira

A verdade que mereceu a pena o traballo feito polo alumnado de 6º e José que cada ano forma un exército de xenerais que paga a pena ver no noso Entroido e que é o mellor con diferenza do Entroido da Bandeira. Unha representación dun atranque de "Xenerais do Ulla" e unha pequena contribución á recuperación do patrimonio inmaterial da "Vía da Prata" do Camiño de Santiago, dentro do noso proxecto "Facendo Camiño".

DÍA MUNDIAL DA RADIO CON PONTE NAS ONDAS

Como ben sabedes estamos a celebrar o "Día da Radio". Outra actividade na que colaboramos foi con "Ponte nas Ondas".

Ponte…nas ondas! foi a primeira experiencia radiofónica que emitiu en streaming, no ano 1997, cando aínda ningunha emisora de radio facía as emisións por Internet

A súa proposta foi participara presentando a nosa radio "Radio Garabullo" dende como se chama, onde está, que facemos na radio, con que medio contamos,...

Decidimos participar coa axuda do alumnado do cole. Agardamos que vos guste o podcast que fixeron.

Escoitade como é Radio Garabullo, da man dos rapaces e rapazas que fan que Radio Garabullo teña vida.

FELIZ DÍA DA RADIO!!

Se queredes ver a nosa participación con "Ponte nas ondas" en Escolas nas Ondas picade na imaxe!!

Agardo que vos guste e a gocedes tanto coma nós!!

DÍA MUNDIAL DA RADIO 2021

Ola amiguiños e amiguiñas!! Onte celebramos o "Día da Radio"  na nosa canle de Radio: "Radio Garabullo" en Ivoox. Hoxe aquí no blog con todos.

Sabedes que a radio é un medio de comunicación que nos permite estar preto da xente. Sentila e coñecela un pouco mellor. A radio acompáñanos, infórmanos, divírtenos, fai que sintamos que non estamos sós.

O 13 de febreiro é a data proposota pola  UNESCO para celebrar o Día Mundial da Radio, nós para festexalo colaboramos con outras radios, grazas a REDE ESPORA, nun programa que quixo achegarnos ás lembranzas de persoas que nos acompañan e nos queren e achegan as súas voces dende toda Galicia. Ademáis do noso centro podedes escoitar a colaboración doutros centros coma CPI Manuel Suárez Marquier no Rosal, CEIP Ben-Cho-Sey de Pereiro de Aguiar, CEIP Frian en Teis, CEIP Víctor Saénz en Mazaricos, CEIP da Torre Cela en Bueu, IES Valadares de Vigo, CEIP A Ponte de Lugo, CEIP Plurilingüe de San Benito de Lérez en Pontevedra e o CEIP Plurilingüe de Chancelas en Combarro.

Coma non puidemos mandar todas as colaboracións tamén podedes escoitar o programa especial que fixemos somentes coas colaboracións do CEIP Ramón de Valenzuela.

Grazas familias por estar sempre aí para participar nas nosas propostas.

FELIZ ENTROIDO!!

Rede ESPORA · Día Mundial da Radio 2021 - Evolución, innovación, conexión - Rede ESPORA

NOVA EDICIÓN DE "AS NOVAS DA HORA DE COMER E CURIOSIDADES DO TEMPO DE LECER"

 Hoxe coma sempre tivemos unha nova emisión en directo, para o comedor do cole, de "As novas da hora de comer e curiosidades do tempo de lecer" emitido por Radio Garabullo. Coma sempre con Esther de 5º como locutora e cunha nova compañeira que quixo probar sorte na radio: Irene de 4º.

Para aqueles que non estades no comedor aquí deixamos o PODCAST de hoxe. Non deixedes de escoitalo, é moi ameno e divertido!!

MURAL DO CAMIÑO

Ola amiguiños e amiguiñas!! Achégase o Entroido e con tanto COVID-19 semella que ata poñer un disfrace é complicado. Coma nós queremos comezar a preparar esta festa e dar folgos de cara a un ano máis divertido que o pasado... Propoñémosvos o seguinte PHOTOCALL do camiño.

Animádesvos a facervos fotos cos vosos propios complementos de peregrinos!!. Gafas, cunchas, bastóns, frechas, cabazos,... TODO VALE!!

Se vos animades facede unha foto para que poidamos ver que guapos e guapas estades chegando á Catedral de Santiago.

As fotos serán publicadas no Blog e na Páxina do cole.

BO CAMIÑO!!!