CONCURSO DE LOGOS NATURARTE

Ola amiguiños e amiguiñas!! Como ben sabedes o proxecto de investigacion "Naturarte" estivo acompañándonos todo o curso. Primeiro asomando nas distintas actividades para lanzarnos á investigación no 2º trimestre.

Foron moitas as cousas que fixemos baixo este lema e que hoxe pechamos, nesta data tan sinalado como é o 5 de xuño o "Día Mundial do Medio Ambiente".

A protección do Medio Ambiente implica a todos. O lema proclamado pola ONU é "Sin contaminación por plásticos" e seguindo este lema ao longo do ano traballamos a redución, reutilización e reciclaxe deste tipo de material. 

Ademais de colaborar con este tema participando na "Patrulla de Patios" encargada da limpeza do mesmo e a reciclaxe do lixo recollido, buscamos a utilización de materias da  natureza para crear arte e creamos recunchos bonitos. Todo dentro dun proxecto chamando Naturarte que hoxe damos por rematado.

Non podíamos dar peche a este proxecto sen escoller un logo para identificalo. Fixemos un concurso onde a vosa participación foi moi gratificante. Resultou duro escoller aos finalistas que foron : Uxía de 3º, Aloia, Nina e Lía Enriquez de 4º e Érika de 6º.

Todos os logos presentados foron fermosos e deixan ver o voso amor pola Natureza. Había que sinalar un gañador e por maioría gañou Aloia de 4º. 

Parabéns a todos e todas pola vosa participación.

NATURARTE 5º: Cestos con xornais e tintes naturais

Ola amiguiños e amiguiñas!! Hoxe toca presentar o proxecto de 5º. Como ben sabedes foron os encargados de formarnos e falarnos sobre o día 15 de marzo o "Día Mundial dos Dereitos do Consumidor". Unha data que deixou moi preocupados aos vosos compañeiros coa idea de reutilizar e reparar os produtos antes que tiralos e mercar outros novos.

Polo programa de Prensa Escola eran conscientes da cantidade de xornais que se tiraban. Buscando unha idea para colaborar co Proxecto Naturarte e aproveitalos decidiron xuntar a idea de reutilizar a prensa e facer cestos, que logo serían decorados con tintes naturais feitos con col, limón, remolacha... e unha gran variedade de materiais. E así xurdiu esta proposta que hoxe nos fan chegar. Ollade!!

NATURARTE Infantil: Escultura con Elementos Naturais

Ola amiguiños e amiguiñas!! Aquí estamos de novo para seguir falando de Naturarte un gran proxecto de investigación que ten cabida para todos. Nesta ocasión tocoulle a Infantil que crearon auténticas obras de arte con elementos naturais. 

Aproveitando os tempos de lecer foron recollendo todo tipo de materiais para as súas composicións: pedras, paus de madeira, follas, piñas, herbas,... todo o que os patios do cole ofrecían. Coma auténticos artistas foron mesturando os materiais e a súa creación e imaxinación e pega que pega foron saíndo un montón de fermosas obras que hoxe adornan a entrada do cole. Un aúténtico traballo de escultura, imaxinación e creatividade!!

NATURARTE 4º: Estampación en Arxila

Ola amiguiños e amiguiñas!! Seguimos presentando o resultado dos vosos traballos de investigación que unen a natureza e a arte. Hoxe tócanos falar do alumnado de 4º. Colaboraron con este proxecto converténdose en expertos artesáns, empregando como material de traballo, a arxila. Aproveitaron as múltiples posibilidades que ofrece este material para experimentar a técnica de estampado, con follas da nosa contorna, creando pezas únicas.

Os vosos compañeiros de 4º contáronnos que esta actividade resultou moi interesante para experimentar con diferentes combinacións de cores e formas fomentando a creatividade, a imaxinación e estimulación sensorial e o desenvolvemento de habilidades de coordinación. Unha posibilidade de aprendizaxe activa que serviu como espazo de relaxación e xestión emocional para todos e todas.

NATURARTE 6º: Pinturas, cunchas e sal

Ola amiguiños e amiguiñas!! Os compañeiros e compañeiras de 6º aproveitaron o proxecto de Naturarte para facer varias cousas e así nolo fixeron saber.

A parte dos proxectos comúns ó longo do curso, centráronse en tres actividades de xeito específico: a decoración de cunchas de vieira, o puntillismos na paisaxe e a decoración de sal con xiz. Dixéronnos que foi sorprendente descubrir a técnica de "decourage": existen auténticos artistas na decoración de cunchas que fan debuxos realistas. Interesante tamén foi ver a pintores como Van Gogh baseándose na técnica do puntillismo, e así o intentaron aplicar a unha paisaxe primaveral ao igual que o alumnado de 5º. Pero contan, que o que máis lles entretivo foi colorear o sal con xices e logo ver o resultado no bote de cristal. De paso aprenderon un pouco sobre a reciclaxe deste material, como se forma e tamén como se obtén a sal. Dan grazas á natureza  por ofrecernos tanto e así poder crear beleza.

NATURARTE 2º: Escultura

Ola amiguiños e amiguiñas!! Continuamos con as actividades levadas a cabo nas aulas como froito da investigación do proxecto Naturarte. Neste caso foi o alumnado de 2º.

A súa proposta partiu dunha necesidade de facer da natureza parte da súa obra. Que os materiais que a natureza aporta se convertisen en ferramentas non so de construción senón tamén de concienciación.

Os nenos e nenas de 2º empregaron arxila, pedras, paos e pétalos de rosa e camelias para facer as súas creacións.

Coma Andy Goldsworthy, escultor escocés, que fai a súa obra con materiais naturais coma follas, ramas, xeo, pedras ou neve; os nosos compañeiros e compañeiras de 2º puxeron a súa creatividade a funcionar e crearon cousiñas fermosas conscientes de que unha vez realizadas a luz do sol, o aire ou simplelmente o paso do tempo terminan devolvéndoas á terra.

Son obras agarimosas e fermosas as que fixeron, incluso algunha nai lanzouse a intentalo e enviounos unha fermosa bolboreta feita con pétalos de rosa.

O motivos para facer este tipo de obras que duran tan pouco é entender a Natureza e o cambio continuo ao que está sometida.

NATURARTE 1º: ESTAMPACIÓN

Ola amiguiños e amiguiñas!! Continúan saíndo actividades resultado do proxecto de investigación que propuxemos: Naturarte

Os nenos e nenas de 1º investigaron como podían facer debuxos coa froita e chegou a eles o concepto de ESTAMPACIÓN; é dicir o proceso de impresión en distintos materiais: telas, coiros ou papeis entre outros.

O alumnado de 1º escolleu a "Estampación" de elementos que tiñan ao seu redor e probaron con froitas, verduras, follas, flores,... impregnados en témpera, acuarela, pintura de mans, tinta... para ver cal quedaba mellor. Tamén probaron con moitos materiais variados entre eles pedras, foam e gomas...

Cos resultados da súa investigacion decidiron sorprender ao alumnado do CEIP Plurilingüe de Oca facéndolles un marcapáxinas como agasallo para conmemorar o "Día das Letras Galegas".

No vídeo podedes ver todo o proceso e o resultado. Os nenos e nenas de 1º anímanvos a probar esta técnica moi rápida e divertida.

RECUNCHO RIQUIÑO

Ola amiguiños e amiguiñas!! O "Recucho Riquiño" precisaba dunha entrada especial polo valor que ten para nós. Foi un proxecto que naceu, coma ben sabedes na aula de 3º e que abriu unha zona de desafogo e un espazo de conversa.

Cando os vosos compañeiros empezaron co proxecto pensaron en pintar un banco do patio. Pero ao investigar algo do Land Art para o proxecto de Naturarte decidiron facer unha pequena intervención no patio do cole. Inspiráronse en Ugo Rondinone, un artista que ten unha obra no Deserto de Mojave, ao sur das Vegas, denominada “Seven Magic Mountains” e trátase de sete torres de rocas de pedra caliza pintadas con cores fluorescentes. 

Así naceu o "Recuncho Riquiño", un grupo de tres pedras pintadas con cores suaves e debuxos, convertido nun lugar para relaxarse, desafogarse, charlar e divertirse. Aseguramos que funciona e que algún problemas do patio foron solucionados neste espazo.  Cando un neno ou nena senta nestas pedras alguén de 3º corre a axudalo ou semplemente a escoitar. Este é o noso Recuncho Riquiño.

Se picades na imaxe podedes ver a proposta de Ugo Rondinone:

NATURARTE 3º: FOTOS FERMOSAS

Ola amiguiños e amiguiñas!! Como ben sabedes andamos a voltas co proxecto Naturarte. Terceiro finalizou o trimestre presentándonos un proxecto moi interesante que está pensado para facer en familia.

Propóñennos saír a pasear pola contorna e aproveitar xuntos o tempo de lecer, un paseo pola natureza para observala e descubrir formas, cores, detalles pintorescos... e inmortalizar eses momentos nunha fermosa foto.

Así o fixeron eles. Cada un trouxo as súas fotos e crearon o seu propio "instagram" de aula. As comentaron e contaron a historia da súa foto. Queredes velas?

DÍA INTERNACIONAL CONTRA O ACOSO ESCOLAR

Ola amiguiños e amiguiñas!! Coma sabedes o pasado 2 de maio foi o "Día Internacional contra o Acoso Escolar".

Durante este mes a clase de terceiro estivo traballando sobre esta temática e buscando ideas para loitar todos xuntos contra o bullying.

Un gran proxecto foi transformar un espazo do cole nun lugar para relaxarse, desafogarse, charlar, divertirse... este é o recuncho riquiño! Entre todo o cole estaremos atentos a se algún compañeiro ou compañeira acode ao lugar e precisa axuda.

NATUREZA

Ola amiguiños e amiguiñas!! Natureza é un poema de Gloria Fuertes que escolleron Cova, Antía, Gaia e Mariña de 3º para levar á radio.

Para Radio Garabullo vai a ser o poema de referencia e orgullo xa que as vosas compañeiras aproveitaron os recreos para facer a escaleta nos ordenadores da biblioteca; e despois foron soas á  radio a facer o programa para todos.

Tamén queremos destacar que estamos a falar dun poema moi fermoso que  está moi unido ao noso proxecto da Biblioteca "NATURARTE".  Unimos a arte de recitar coa temática do proxecto e temos o recitado que as vosas compañeiras fixeron de Naturaleza.

MÁSCARAS NATURARTE

Ola amiguiños e amiguiñas!! A natureza está presente en todo o que nos rodea e a nosa labor é coidala, respectala e valorala. A natureza é vida e a súa esencia está presente en todo. Este ano dedicamos o proxecto da biblioteca a combinar Natureza e Arte. Estamos aprendendo que dunha pedra temos un símbolo de paz, dun pau ou dunha tora dun tronco un adorno para Nadal, de papeis vellos corazóns de amizade....

Seguindo esta idea decidimos facer os nosos antefaces para o Entroido aproveitando o que imos encontrando no patio, nos camiños ou de camiño ao lixo. A verdade que fixemos antefaces ben bonitos e para mostra este resumo!!

PROXECTO NATURARTE

Ola amiguiños e amiguiñas!! Chegou o momento de poñer a andar o Proxecto máis directamente na aula.

Naturarte é o que está a rodear todas as actividades que estamos a facer no cole este ano. Tanto as que fomos propoñendo ata agora coma as que están por vir. 

Ata o momento foron os mestres os que nos foron guiando as actuacións: Houbo unha entrevista a Abraham Cupeiro que fai instrumentos impresionante con elementos da natureza, fixemos unha visita virtual ao Monte Viso onde conviven natureza, arte, tradición, lenda... e recreamos o noso propio Monte Viso. Traballamos a paisaxe da nosa contorna facendo unha reinterpretación da "Fervenza do Toxa" seguindo a Andy Warhol, decoramos o Nadal do cole con elementos naturais e moitas cousas máis. Agora toca facelo dun xeito máis serio: INVESTIGANDO

O proxecto que nós chamamos "Naturarte" xa existía. Baixo o nome de "Land Art" ou tamén "Arte da Terra". Con este nome faise referencia a unha corrente de arte contemporáneo na que a paisaxe e a obra están moi relacionados. Emprega á Natureza coma material: madeira, follas, pedras, rochas,... para facer as creacións finais.

No cole este Proxecto pode abordarse dende distintos puntos de vista: Con experimentos científicos; escultura (investigación de artistas, creación de bichos con follas e paus, intervencións na natureza,...); investigación de artistas "Land Art";  investigación das cores ( a súa orixe, o círculo cromático...); estampación con elementos da natureza, tinturas naturais (café, remolacha, cúrcuma...), a fotografía do que nos rodea (nubes, flores, pedras,...)

Todas estas actividades e máis agardamos vaian desenvolvéndos nas aulas e aparezan no mes de maio coma froito do voso traballo a través de exposicións, murais, podcast, vídeos, esculturas,...

Para animarvos deixamos aquí un vídeo dun proxecto que fai o escultor Camilo Seira en Rois, preto de Santiago. É un proxecto de Land Art. Invita a máis de 30 artistas que teñen que facer arte cos materiais que teñen arredor. Dende bosta de vacas, palla e mesmo restos de madeira. Con esta actividade queren darlle un valor estético, mirar a riqueza do que temos a man. Pensade que os nosos antepasados facían todo o que necesitaban con materiais que tiñan ao alcance... Para inspiraros déixovos un dos vídeos que colgou un dos artistas asistentes a este evento. Chámase Alfonso Blanco e é escultor. É fantástico o resultado da súa obra. Non deixedes de ollalo....

Agardo os vosos traballos!!