As Maletas Ponte a Zero deixan o primeiro ciclo

Ola amiguiños e amiguiñas! Os nenos e nenas de 1º ciclo de Primaria estiveron a gozar estes días dos materiais das Maletas Ponte a Zero, un recurso educativo do CEIDA que achega ao alumnado unha ampla selección de libros, contos e materiais relacionados co coidado do medio ambiente, a redución de residuos e os hábitos de vida sostibles.

Ao longo destas semanas, o alumnado aproveitou estes recursos para ampliar as súas investigacións, descubrir novas lecturas e seguir aprendendo sobre a importancia de respectar e coidar a natureza. Os libros da maleta convertéronse nunha ferramenta perfecta para buscar información, resolver dúbidas e espertar a curiosidade dos máis pequenos.

Esta experiencia encaixa á perfección co proxecto da biblioteca escolar que están a desenvolver este curso e que terá continuidade o vindeiro ano cun reto moi especial: a recuperación do horto escolar. A través das lecturas e actividades propostas, os nenos e nenas están a coñecer mellor o ciclo das plantas, a importancia da biodiversidade, a compostaxe e os beneficios de producir alimentos de forma responsable e respectuosa co medio.

Queremos agradecer ao CEIDA a cesión destas maletas, que nos permiten achegar a educación ambiental ao alumnado dunha forma atractiva, participativa e chea de aprendizaxes significativas.

Porque aprender a coidar a terra tamén se aprende lendo.

PROGRAMACIÓN SCRATCH para 3º ciclo

Ola amiguiños e amiguiñas! O alumando do 3º ciclo participou o venres  nun dos obradoiros do programa Rural TIC, unha iniciativa impulsada por Ineco e promovida polo Concello de Silleda para continuar achegando a tecnoloxía e as competencias dixitais ao rural.

Nesta ocasión, o alumnado de 5º e 6º de primaria, puido achegarse ao mundo da programación a través de Scratch, unha ferramenta educativa coa que aprenderon, dun xeito divertido e creativo, os primeiros pasos da programación informática.

Durante a sesión realizaron pequenas actividades e retos adaptados á súa idade, desenvolvendo a lóxica, a creatividade e o pensamento computacional mentres aprendían xogando.

Agradecemos ao Concello de Silleda e ás persoas encargadas do programa Rural TIC esta interesante proposta formativa.

Begoña Caamaño na fachada do cole

Ola amiguiños e amiguiñas! Dende esta semana loce na fachada do noso cole unha nova imaxe dedicada á homenaxeada das Letras Galegas deste ano, a gran Begoña Caamaño.

ESCAPE ROOM en 3º de Primaria

Ola amiguiños e amiguiñas!! Como sabedes os nenos e nenas de 3º de Primaria gañaron a 3ª ronda de "Liga Saudable de Plátano de Canarias", un torneo escolar que combina aprendizaxe e diversión a través de aventuras educativas en formato escape-room dixital.

Grazas ao premio, puideron participar na escola nun Escape Room cunha misión crucial: rescatar da historia o legado de mulleres referentes que abriron camiño, como Rosalía de Castro, Frida Khalo e Marie Curie,  rompendo así as cadeas dos estereotipos de xénero que aínda hoxe persisten na nosa sociedade.

Enfrontándose a diferentes retos, o alumnado entendeu que non existen "xogos de nenos" nin "xogos de nenas", nin profesións, nin cores determinadas polo xénero, senón persoas con capacidades extraordinarias que merecen as mesmas oportunidades.

O momento máis especial chegou co reto final,  abrir o cofre e "romper as cadeas" colaborando dende a empatía e o respecto mutuo, demostrando que a igualdade é, por riba de todo, un traballo en equipo.

CRISTINA COLLAZO : Ficción sonora sobre a obra de Begoña Caamaño

Ola amiguiños e amiguiñas!! Grazas ao programa Lectura e Familias, tivemos a sorte de contar coa visita de Cristina Collazo, quen levou a cabo unha fantástica formación dirixida ás familias do noso centro.

A actividade tivo como obxectivo a creación dunha ficción sonora a partir dun texto de Begoña Caamaño, autora homenaxeada este ano nas Letras Galegas. Deste xeito, unimos dous importantes fíos condutores: dar a coñecer a figura e a obra de Begoña Caamaño e achegarnos ao mundo da radio, unha das súas grandes paixóns.

Ao longo da sesión, as familias participaron en diferentes xogos e dinámicas para traballar o corpo, a voz, a expresión e a creatividade, descubrindo todas as posibilidades que ofrece o son para contar historias.

Queremos agradecer especialmente ás familias a súa implicación e participación nesta actividade, así como a Cristina Collazo pola súa profesionalidade, entusiasmo e magnífico traballo, que nos permitiu vivir unha experiencia tan enriquecedora e divertida.

O noso horto vai collendo forma 🌱

 Ola amiguiños e amiguiñas!! Continuamos avanzando no noso PDI coa recuperación do
horto escolar e xa rematamos unha nova parte deste proxecto tan especial. Nesta ocasión, o alumnado de 1º de Primaria puxo en práctica a súa creatividade e habilidade empregando os lápices 3D para elaborar os letreiros dos útiles do horto, que xa quedaron colocados nos andeis do horto para manter todo organizado e preparado.

A plantación xa comezou, cada aula escolleu o que quería cultivar e agora toca repartir as quendas de coidado e rega.

• Infantil escolleu leituga
• 1º e 2º de Primaria: leituga lisa e berenxena
• 3º e 4º de Primaria: cebolas e leituga rizada
• 5º e 6º de Primaria: pementos e leituga negra

Pouco a pouco, entre todas e todos, estamos devolvéndolle a vida ao noso horto escolar, aprendendo a coidar, colaborar e valorar a importancia da natureza e da alimentación saudable. 

VALORACIÓN DA BIBLIOTECA

 Ola amiguiños e amiguiñas! Como sabedes estamos a piques de rematar o curso, polo tanto é o tempo de valorar todo o traballo que estamos a facer. Estades dispostos? 

5º de Primaria, premio á reflexión e á igualdade!

 Ola amiguiños e amiguiñas! Queremos felicitar con moito orgullo ao alumnado de 5º de Primaria por resultar gañador do concurso da Deputación de Pontevedra “E ti, que pensas da igualdade?”, unha iniciativa que promove a reflexión, a creatividade e o pensamento crítico arredor dun tema fundamental: a igualdade real entre mulleres e homes.

Este certame, enmarcado nas accións do 8M, busca dar voz á infancia e á mocidade para que expresen a súa visión sobre a sociedade actual e propoñan ideas para avanzar cara a un futuro máis xusto e igualitario. E o noso alumnado non só participou… ¡senón que destacou co seu gran traballo!

O proxecto desenvolvido foi moito máis alá: partindo da reflexión na aula, o alumnado afondou nos retos actuais da igualdade a través de diferentes actividades. Entre elas, cómpre destacar o compromiso e a valentía de dúas alumnas que se desprazaron para entrevistar á científica Marisol Soengas, referente internacional na investigación, achegando así unha visión inspiradora sobre o papel da muller na ciencia.

Como peche, o traballo completouse coa creación dun podcast e outras producións co gallo do 11 de febreiro (Día da Muller e a Nena na Ciencia) e do 8 de marzo, integrando aprendizaxes, reflexións e propostas propias.

Parabéns, equipo! 💜👏

LAMBECAZOLAS: Ensalada de Pasta por Manuela de 5º de Infantil

Ola amiguiños e amiguiñas!! Xa empezan a chegar algunhas receitas de Lambecazolas, que este curso invita a preparar ENSALADAS.

Comezamos coas primeiras receitas fresquiñas e saudables para o verán. Nesta ocasión, Manuela de 5º de  Infantil converteuse en auténtica protagonista e ensinounos, a través dun vídeo, como preparar unha rica Ensalada de Pasta. Con moita ilusión, explicou paso a paso os ingredientes e o proceso, convertendo a actividade nun momento divertido, educativo e cheo de sabor.

📽️ Aquí podedes ver o vídeo no que a nosa pequena chef nos ensina a súa receita de verán.

Un ratiño na biblioteca… mil posibilidades! 📚✨

Ola amiguiños e amiguiñas! Ás veces, mentres agardamos pola seguinte actividade, a biblioteca do cole convértese nun espazo cheo de vida e oportunidades. E iso foi xusto o que lles pasou os nenos e nenas de 4º de primaria!

Aproveitamos ese tempiño para explorar, crear e, sobre todo, gozar. Houbo quen se animou a construír co LEGO, deixando voar a súa imaxinación con creacións sorprendentes. Outros retaron a súa mente co cubo máxico de Rubik e con xogos diversos, compartindo estratexias e risas.

Tamén tivemos tempo para a creatividade, elaborando chapas moi orixinais, e, por suposto, para mergullarnos na lectura, descubrindo historias que nos fixeron viaxar sen saír do sitio.

Porque a biblioteca non é só un lugar para ler… é un espazo para aprender, xogar, crear e convivir. Cada ratiño conta! 💛

Ola amiguiños e amiguiñas!! O xoves tivemos a sorte de contar coa visita de Merchi, a avoa de Carmen e Elena, que estivo co alumnado de 1º ciclo e 5º de Primaria compartindo unha receita moi especial que facía cos seus pais cando era pequena: “Os Bolos do Dulceiro”, que despois levaban a vender á Feira da Bandeira.

Foi unha xornada chea de recordos, aprendizaxe e moito sabor, na que descubrimos unha parte da nosa tradición a través das mans e da memoria de Merchi.

Grazas, Merchi, por compartir con nós esta experiencia tan bonita e por facernos probar uns boliños tan ricos… que case non deixamos nin as faragullas!

XORNADA DE RADIO NO INSTITUTO

 Ola amiguiños e amiguiñas!! Estamos nunha época de celebracións da lingua galega. Son moitas as actividades que levamos a cabo para achegarnos a homenaxeada polas Letras Galegas; Begoña Caamaño.

A través de xogos, investigación e lecturas de libros e biografías imos entendendo a importancia do noso.

Os nenos e nenas de 6º achegáronse a Begoñas Caamaño dun xeito distinto, a través dunha entrevista ficticia a nosa autora. Neste caso, pedíronlle á Intelixencia Artificial que asumise o rol de Begoña e este foi o pequeno podcast resultado deste traballo.

Ademais aproveitaron o programa de radio para ir a Silleda a compartir unha xornada de Radio e Letras Galegas cos nenos e nenas do IES Pintor Colmeiro. Foi unha xornada marabillosa, entretida, festiva, e de encontros.

Aquí deixamos o pequeno podcast co que participamos e o vídeo que nos enviaron do IES Pintor Colmeiro para que poidades ver o traballo tan grande e marabilloso que fixeron.

Descubrindo Queco e Kika con Eva Mejuto

Ola amiguiños e amiguiñas!! O pasado 12 de maio tivemos a sorte de recibir a visita de Eva Mejuto. Compartiu un tempo moi especial co alumnado de 3º e 4º de Primaria, falándonos do seu libro Queco e Kika. Encantounos a historia e, sobre todo, descubrir da súa man as curiosidades e segredos que agocha.

Ademais, tivemos a oportunidade de facerlle preguntas, compartir impresións e afondar un pouco máis no mundo da lectura e da creación de historias, o que resultou unha experiencia moi enriquecedora e motivadora para seguir lendo e escribindo.

Moitas grazas, Eva, por esta visita tan especial!

Coñecendo a Begoña Caamaño con 6º

 Ola amiguiños e amiguiñas!! O pasado xoves para celebrar as Letras Galegas e homenaxear á figura de Begoña Caamaño  o alumnado de 6º de Primaria puxo en marcha a súa creatividade para realizar un programa de radio moi especial: unha entrevista imaxinaria a Begoña Caamaño.

As nosas reporteiras nvestigaron sobre a súa vida e obra, prepararon preguntas e déronlle voz a esta autora tan importante das Letras Galegas.

Aproveitaron, tamén,  para ler pequenos tips informativos e descubrir aspectos clave da traxectoria e da importancia de Begoña Caamaño na literatura galega, a través da cartelería enviada pola Xunta, 

CREATIVIDADE QUE FAI CAMIÑO

Ola amiguiños e amiguiñas! Estamos de celebración! Queremos felicitar a Mariña de 6º de Primaria por gañar un premio no programa Escola en Camiño, organizado polo xornal Faro de Vigo.

Este programa achega ao alumnado ao Camiño de Santiago a través da imaxinación e a creación, propoñendo actividades como debuxos, textos ou vídeos.

Mariña participou cun debuxo cheo de creatividade, no que soubo representar o espírito do Camiño. O seu traballo foi recoñecido polo xurado, converténdose nun exemplo do talento e creatividade.

Parabéns polo teu gran traballo! 

LAMBECAZOLAS DE VERÁN

Ola amiguiños e amiguiñas!! Un ano máis chega o "Lambecazolas". Atendede á información e preparade as vosas receitas!! Non esquezades que teñen que ser saudables!!

Descubrindo a vida e obra de Begoña Caamaño

 Ola amguiños e amiguiñas!!

No marco das Letras Galegas, compartimos unha nova publicación na que podedes atopar información completa e actualizada sobre a vida e a obra de Begoña Caamaño, a autora homenaxeada este ano.

Trátase dun recurso pensado para achegarnos de maneira clara e ordenada á súa figura, permitindo ao alumnado coñecer mellor quen foi, que escribiu e cal foi a súa achega á literatura galega.

Nesta publicación poderedes:
📖 Coñecer os aspectos máis importantes da súa biografía.
📖 Achegarvos ás súas obras máis destacadas.
📖 Comprender a relevancia do seu legado cultural.

Animámosvos a ler con calma, investigar e seguir descubrindo a riqueza da nosa literatura.

Porque coñecer ás nosas autoras e autores é tamén unha forma de manter viva a nosa lingua. Premede na imaxe

#LetrasGalegas #BegoñaCaamaño

Poñémonos a proba con Begoña Caamaño!

Ola amguiños e amiguiñas!!

Seguimos aprendendo e gozando coas Letras Galegas cunha proposta diferente e moi divertida: xogos en liña para comprobar todo o que sabemos sobre Begoña Caamaño.

A través destes recursos interactivos, o alumnado poderá poñer a proba os seus coñecementos dun xeito lúdico, repasando a súa vida, a súa obra e a súa importancia na literatura galega.

Con estes xogos poderedes:
🎮 Aprender xogando.
🎮 Reforzar contidos traballados na aula.
🎮 Compartir e gozar en familia.

Animámosvos a participar, probar os xogos e demostrar todo o que xa sabedes!

Porque aprender tamén pode ser divertido!

Ide premendo nas imaxes!!

#LetrasGalegas #BegoñaCaamaño

Recursos para imprimir sobre Begoña Caamaño

Ola amiguiños e amiguiñas!!

Continuando coa celebración das Letras Galegas, no noso centro queremos seguir ofrecendo materiais útiles para coñecer mellor a figura de Begoña Caamaño.

Nesta ocasión, compartimos os recursos elaborados polo Seminario Galán, pensados especialmente para traballar nas aulas e tamén na casa. Trátase de materiais imprimibles, sinxelos e atractivos, que permiten ao alumnado achegarse á autora dun xeito dinámico e participativo.

A través destes recursos poderedes:
📝 Realizar actividades de comprensión e reflexión.
📝 Coñecer aspectos destacados da súa vida e obra.
📝 Traballar de maneira creativa arredor da literatura galega.

Animámosvos a empregar estes materiais e seguir descubrindo, aprendendo e gozando coa nosa lingua, para atopalos premede na imaxe

#LetrasGalegas #BegoñaCaamaño

LETRAS GALEGAS NA RAG: Quen foi Begoña Caamaño? Descúbreo aquí!

 Ola amiguiños e amiguiñas!!

Con motivo da celebración das Letras Galegas, no noso centro queremos achegar ao alumnado a figura de Begoña Caamaño, autora homenaxeada este ano.

Para facilitar o acceso á información e seguir aprendendo dun xeito sinxelo e atractivo, poñemos á vosa disposición os contidos elaborados pola Real Academia Galega (RAG), onde poderedes descubrir quen foi, que escribiu e por que é tan importante para a nosa lingua e cultura.

A través destes recursos, o alumnado poderá:
📚 Coñecer a súa vida e a súa traxectoria.
📚 Achegarse ás súas obras máis destacadas.
📚 Comprender a importancia do seu legado na literatura galega.

Animámosvos a explorar estes materiais, ler, investigar e seguir gozando da nosa lingua.

Porque coñecer ás nosas autoras e autores é tamén unha forma de coidar e valorar o galego.

Premede na imaxe!!

#LetrasGalegas #BegoñaCaamaño

Ola amiguiños e amiguiñas! Como xa sabedes os nenos e nenas de 4º participaron na II Edición dos Premios José Hermida de Radio Pontevedra, chegando á final cun podcast baseado no conto “A mellor sopa do mundo”, no que se destacou a importancia dunha alimentación saudable e de proximidade.

Aínda que non acadamos o premio principal, recibimos unha mención especial por parte de Vegalsa, unha empresa das que patrocinaban o certame, que quixo recoñecer o noso traballo cun pequeno agasallo para o alumnado.

Ademais, tivemos a sorte de contar coa visita de Paula, alcaldesa de Silleda, e de Ángela, concelleira de Educación, que quixeron compartir con nós este recoñecemento.

Dende o centro queremos agradecer este xesto e felicitar ao noso alumnado pola súa implicación, creatividade e esforzo.

Aquí deixamos un resumo dunha xornada inesquecible e emocionante.

Ola amiguiños e amiguiñas!! Hoxe o alumnado de 4º vai a estar na II Gala dos Premios José Hermida, xunto con outros 20 centros, fson finalistas dos Premios Joseé Hermida do Grupo Radio Pontevedra. Alí coñeceremos os gañadores desta 2ª Edición.

Animámosvos a seguir en directo a gala nesta ligazón 

https://www.youtube.com/@RadioPontevedraSER , nas emisoras 1116 OM, 92.7FM, na APP da Cadena Ser, y en la web de Radio Pontevedra. ás 10:45 e de seguido, escoitedes o programa especial cos gañadores, Hoy por Hoy Pontevedra-Arosa I Premios José Hermida ás 12:25 ben a través da aplicación ou das emisoras convencionais: Radio Pontevedra no 98.7 FM, Radio Arosa 95.6 FM ou Radio Pontevedra Deza-Tabeiros 92.2 FM.

Moita sorte a todos e todas!!!

2 de maio : Día Internacional contra o bullying

Ola amiguiños e amiguiñas!!  O pasado 2 de maio foi o Día Mundial contra o Bullying, no noso centro sumámonos á conmemoración desta data clave para reflexionar, aprender e seguir construíndo unha escola segura e respectuosa para todos e todas.

Sabemos que o bullying non sempre é visible, pero sempre doe, e de que todos e todas podemos facer algo para evitalo: escoitar, acompañar, pedir axuda e, sobre todo, tratar aos demais como nos gustaría que nos tratasen.

Desde o noso cole queremos seguir reforzando unha mensaxe clara:
- O respecto é cousa de todos e todas.
- A amizade constrúese día a día.
- Xuntos e xuntas somos máis fortes contra o acoso.

Seguiremos traballando para que a nosa escola sexa un espazo onde cada neno e cada nena se sinta valorado, escoitado e feliz.

Lembrade que ademais no noso centro contamos cun Punto Laranxa, situado no pasillo que vai cara aos baños que empregamos no recreo. Tamén na páxina web do centro (no lateral dereito), podedes acceder premendo na imaxe.

Trátase dun espazo de referencia que tedes os nenos e nenas. Alí podedes acudir se necesitades axuda, se queredes contar algo que vos preocupa ou se detectades unha situación de acoso.

O Punto Laranxa serve para lembrar que:

🧡 Pedir axuda é valente.
🧡 Todas as persoas merecen ser escoitadas.
🧡 Entre todos e todas podemos coidar o bo trato no cole.

Por outra banda, dende a biblioteca aconsellamos a lectura do libro de Eloy Moreno: Invisible nas dúas versións que temos no cole tanto para prelectores coma para lectores autónomos.

Tamén convidámosvos a ver o  vídeo realizado polo alumnado de 5º para participar no concurso ""Canta y baila contra el bullying" convocado pola empresa Giotto e a Asociación Española contra o Acoso Escolar.

🎙️ Soa a emoción… soa a familia

Ola amiguiños e amiguiñas!! Benvidos a Radio Garabullo... Hoxe, na nosa radio… hai algo especial ✨

Hai voces que emocionan.
Hai palabras que acompañan.
Hai familias que están… sempre.

O noso alumnado é finalista da II edición dos Premios José Hermida de Radio Escolar, organizados por Radio Pontevedra do grupo Cadena SER.

Entre 107 centros e 117 podcasts, o seu traballo foi elixido como un dos 20 mellores.
E iso… xa é un gran premio... NORABOA!!

Pero hoxe non falamos só de logros.
Hoxe falamos de emocións.

Porque as nais e pais quixeron achegarse á nosa emisora…
coller un micrófono…
e dicir algo moi importante:

“Estamos orgullosos de vós” 

Un podcast cheo de agarimo, ánimo e ilusión para a gran final.

Porque detrás de cada neno e nena… Hai unha familia que apoia, que anima e que cre.

E iso… tamén conta. E moito.

👏 Parabéns, finalistas
🍀 Moita sorte na final

Agora si… escoitamos 

Feira do Libro na FEIRA DA BANDEIRA

Ola amiguiños e amiguiñas!! No noso cole vivimos unha xornada moi especial coa celebración da nosa Feira do Libro, coincidindo co Día da Feira de Bandeira.

Baixo o lema “Libros que alimentan”, organizamos un posto moi solidario no que todo o alumnado puido intercambiar libros por produtos de hixiene, alimentos non perecedoiros ou facer unha pequena doazón. Todo o recadado foi entregado a servizos sociais para axudar ás familias que máis o precisan.

A actividade non quedou só no posto, senón que continuou nas aulas con diferentes propostas:

• O alumnado de 3º e 4º participou nunha divertida gymkana, na que foron recompilando información polos distintos postos da feira. Para rematar, celebraron o seu esforzo compartindo uns churros e colaborando tamén no posto de libros.

• Os máis pequenos de infantil saíron a dar un paseo para coñecer de preto o mercado de Bandeira, descubrindo o seu ambiente e funcionamento.

• O alumnado de 5º de Primaria puxo en práctica as matemáticas na vida real, acudindo ao supermercado para mercar leite e aceite. Tiveron que contar cartos, facer estimacións e calcular canto podían comprar e canto lles sobraba.

Foi unha xornada chea de aprendizaxes, convivencia e solidariedade, na que demostramos que os libros tamén poden alimentar… e moito máis que a mente 💫

🎥 Aquí vos deixamos un vídeo resumo de todo o vivido!

Recuperando o Coto da Gaiteira 🌳

Ola amguiños e amiguiñas!! Os nenos e nenas de 3º e 4º de Primaria de Educación Primaria continúa implicado no coidado e recuperación  do Coto da Gaiteira, un espazo do centro no que hai anos encheuse coa plantación de numerosas árbores frondosas, pero que co paso do tempo foi quedando algo descoidado.

Co obxectivo de coñecer mellor a súa historia e avanzar na súa recuperación, tivemos a sorte de contar coa visita de José, antigo mestre do cole, e impulsor deste fermoso proxecto, quen no seu día chegou a plantar máis de 40 especies diferentes de árbores.

Durante a xornada, o alumnado non só puido percorrer o coto da súa man, senón que tamén aproveitou para realizarlle unha entrevista, na que lles contou como foron os inicios deste espazo e lles deu valiosos consellos para coidalo e mantelo no futuro.

Se queredes saber o que falaron aquí tedes a entrevista realizada, así como un vídeo resumo desta experiencia tan enriquecedora.

Seguimos aprendendo e medrando xuntos, coidando e recuperando os espazos que forman parte da nosa historia 🌿

Visita de Iván o pai de Eire

Ola amiguiños e amiguiñas!! Hoxe contamos coa vista de Iván o pai de Eire de 5º, que traballa como garda forestal.

A través de vídeos e explicacións moi interesantes, achegounos ao seu día a día, amosándonos en que consiste o seu traballo e cal é a súa importancia para coidar e protexer o noso entorno natural.

Falounos das tarefas que realiza un garda forestal, dos riscos aos que se enfronta no seu traballo, a  importancia de previr incendios e coidar os montes ou como podemos contribuír nós tamén á protección da natureza.

Fixo fincapé en todo o relacionado cos incendios forestais, entendendo o perigosos que poden ser e o fundamental que é actuar con responsabilidade.

Grazas aos vídeos, puidemos ver situacións reais do seu traballo, o que fixo a experiencia moito máis próxima e interesante.

Foi unha charle moi interesante que nos axudou a valorar a importancia de profesións fundamentais para o coidado do medio ambiente.

Moitas grazas Iván por compartir con nós esta experiencia tan valiosa!

NA SEMANA DO LIBRO... Cada día unha pregunta

Ola amiguiños e amiguiñas! Continuamos coa celebración da semana do Día do Libro e coas preguntas relacionadas con vós e a lectura. Hoxe foi a quenda do alumnado de 5º que aproveitaron os apadriñamentos lectores para facernos as preguntas.

Así, despois das lecturas, percorreron todo o patio, micro en man, preguntando a compañeiros e compañeiras, a algúns mestres e as familias:
Cal é o voso conto favorito?

Queredes saber as vosas respostas? Pois... adiante vídeo!

Visita de Fernando o pai de Sabela de 5º

Ola amiguiños e amiguiñas!! No noso centro estamos cada vez máis comprometidos co coidado do medio ambiente, e pouco a pouco imos dando pasos importantes para mellorar os nosos hábitos, especialmente no relacionado coa reciclaxe.

O alumnado de 5º de Primaria puxo en marcha unha iniciativa moi interesante: a vixiancia dos colectores do patio, asegurándose de que os residuos se depositen correctamente. Ademais, elaboraron cartelería clara e visual para axudar a toda a comunidade educativa a facer unha correcta separación do lixo.

Pola súa parte, en 3º e 4º de Primaria traballaron arredor do Día da Terra, reflexionando sobre a importancia de coidar o noso planeta e os pequenos xestos que podemos facer no día a día. Como resultado, crearon un cartel informativo que xa está colocado no 1º andar, recordándonos como separar correctamente os residuos.

Ademais, tivemos a visita de Fenando, o pai de Sabela, alumna de 5º, que traballa na recollida de lixo co camión. Estivo acompañado de José o seu compañeiro de traballo, de Paula a alcaldesa e de dous concelleiros Ángela e Requeijo. Grazas á súa explicación, puidemos coñecer de primeira man como é este servizo esencial, que ocorre cos residuos unha vez que os depositamos e a importancia de facer ben a separación dende a casa e o cole.

Todas estas accións forman parte dun compromiso común: ser máis responsables, máis conscientes e máis respectuosos co noso entorno.

Porque pequenos xestos… poden cambiar o mundo.

Un cole que le: celebrando o Día do Libro xuntos

 Ola amguiños e amiguiñas! Acabamos de rematar unha semana moi especial arredor da lectura, chea de propostas que nos fixeron gozar, compartir e descubrir o pracer de ler dende diferentes perspectivas.

Comezamos levando os libros ao aire libre na "Hora de Ler”, onde pequenos e maiores puideron desfrutar das súas historias favoritas aproveitando o bo tempo, nun ambiente relaxado e diferente.

Continuamos cunha das nosas tradicións máis queridas: os apadriñamentos lectores, nos que alumnado de Infantil e Primaria compartiu lecturas, creando vínculos moi especiais entre maiores e pequenos. Unha actividade que, ano tras ano, segue sendo das máis agardadas!

O alumnado de 5º e 6º de Primaria tamén puxo en marcha unha proposta moi creativa e sostible: a elaboración de marcapáxinas a partir de libros vellos. Estes marcapáxinas foron repartidos entre os compañeiros e compañeiras do centro, dándolle unha nova vida a materiais que xa non se utilizaban e fomentando, ao mesmo tempo, o gusto pola lectura.

Alumnado de 5º e 6º repartindo os marcapáxinas

Ademais, o alumnado de 3º, 4º, 5º e 6º de Primaria converteuse en auténtico equipo de reporteiros, realizando entrevistas aos seus compañeiros e compañeiras do centro. As preguntas xiraron arredor da lectura:

• Onde lles gusta ler?
• Que tipo de contos ou lecturas prefiren?
• Cal é o seu conto favorito?
• Que actividades relacionadas coa lectura lles gustan máis?

As respostas deixáronnos ver a gran variedade de gustos e, sobre todo, que a lectura forma parte do día a día do noso alumnado, xa sexa na casa, no cole ou en calquera recuncho especial.

Todo este traballo estivo acompañado por un mural na entrada do centro, que foi elaborado, polo alumnado de 5º,  con libros vellos e materiais reutilizados, aos que lles demos unha nova vida para convertelos nunha fermosa decoración chea de creatividade e significado.

Preparando o Mural

O RESULTADO

E aínda nos queda unha das citas máis solidarias (que será o 29 na feira): a nosa feira do libro, na que intercambiaremos libros procedentes do expurgo por alimentos non perecedoiros ou produtos de hixiente. Todo o recollido será doado ao Concello para axudar ás familias que máis o precisan. Un xeito de unir lectura e solidariedade.

Sen dúbida, foi (e segue sendo) unha celebración moi completa, na que a lectura se converteu no eixo para aprender, compartir e tamén axudar aos demais.

Apadriñamentos Lectores

Ola amiguiños e amiguiñas! Con motivo do Día do Libro, no noso cole volvemos celebrar unha das actividades máis especiais e agardadas do curso: os apadriñamentos lectores.

Ano tras ano, esta proposta convértese nun momento moi querido por todo o alumnado. Os nenos e nenas de Educación Infantil e Primaria xúntanse para compartir lecturas, creando parellas nas que os maiores acompañan aos máis pequenos nunha experiencia chea de aprendizaxe, de cooperación. Non esquezamos ler tamén é compartir.

HORA DE LER no patio

Ola amiguiños e amiguiñas!! Esta semana, coincidindo coa celebración do Día do Libro, no noso cole decidimos levar a lectura máis alá das aulas… e saír ao patio para gozar dela ao aire libre!

Aproveitando o bo tempo e os recunchos tranquilos do centro, os nenos e nenas participaron na actividade “A hora de ler no patio”, un espazo especial onde os libros foron os grandes protagonistas. Baixo o sol, entre risas e momentos de calma, cada quen escolleu a súa historia favorita para mergullarse nela.

Sen dúbida, foi unha experiencia moi enriquecedora que repetiremos pronto. Porque ler… tamén pode ser unha aventura ao aire libre!