SEMANA DA PRENSA

Ola amiguiños e amiguiñas!! Entre o 7 e o 11 de marzo celebramos a Semana da Prensa. Como é costume no noso centro mercamos todo tipo de xornais e traballamos con eles de distintos xeitos. Cada ano novas ideas e novas formas de traballar... E tamén novas propostas para o traballo diario de aula. Queredes saber o que se fixo en primaria nesta semana? Pois dádelle a "play".

OBRADOIRO DE RADIO CON "PONTES NAS ONDAS"

Ola amiguiños e amiguiñas!! O pasado venres os compañeiros e compañeiras de 3º e 4º contaron coa visita da xente de "Ponte nas Ondas" cos que aprenderon moitas cousas dos programas de radio e da súa edición. Ata chegaron a crear o seu propio programa que, coma todos os programas da radio, será emitido por Radio Garabullo para o comedor da escola.

ALTO DOS XENERAIS

Ola amiguiños e amiguiñas! Como ben sabedes unha das cousas que máis nos gusta celebrar neste cole é o Entroido. Dende finais de decembro, principios de xaneiro os maiores do cole comezan a prepararse para o Alto dos Xenerais Infantil coa axuda de José. Escriben as súas arengas buscando os puntos febles tanto dos compañeiros coma do colexio, do pobo ou da contorna.

A preparación é longa: escribir arengas, memorizalas, interpretalas, preparar as roupas,... Pero compensa! Non hai nada coma a emoción de participar no Alto dos Xenerais Infantil de Bandeira.

Este ano, tamén contaron coa sorte de ser invitados polo CEIP Xoaquín Loriga de Prado a vivenciar o froito do seu traballoe coma sempre tamén fixeron o "Alto" para todos nós na entrada do cole.

Queredes velos outra vez?

Pequeno resumo dos Altos escenificados polos Xenerais do colexio no Entroido 2022

Atranque dos Xenerais do colexio celebrado o xoves 24 de febreiro 2022

FELIZ DÍA DA MULLER

Ola amiguiños e amiguiñas!! Onte recibimos un panel enorme que loce nas escaleiras dos cole. A partir dunha foto de cada un de vós, fixemos un fermoso cartel que amosa que neste cole, nenas e nenos medramos unidos por un mesmos desexo de igualdade.  que sabemos traballar con respecto, somos coñecedores de que todas e todos temos os mesmos dereitos e oportunidades. Aquí queda o cartel para que vos busquedes formando parte deste traballo do Día Internacional da muller.

8M Galegas na Ciencia

Ola amiguiños e amiguiñas!! Hoxe celebramos o "Día Internacional da Muller". Xa sabemos que cada aula a traballa de xeito distinto dependendo da idade e os intereses de cada un. Os nenos e nenas de 2º quixeron deixarnos unha proposta para chegarnos as "Galegas Científicas" tan pouco coñecidas por nós.

Tamén aproveitaron para contarnos o que saben do 8M e para falarnos de María Tarsy Carballas, xa que está relacionada co noso proxecto. Tarsy era edafóloga, é dicir, unha investigadora dos solos e buscaba a pronta recuperación destos despois dos incendios.

Ollade o que vos propoñen os vosos compañeiros e compañeiras de 2º

8 DE MARZO "DÍA INTERNACIONAL DA MULLER"

Ola amiguiños e amiguiñas!! Hoxe celebramos o "Día da Muller". É un tema que traballaredes nas aulas de distintas formas: investigando, debatendo, con pequenas lecturas e creacións artísticas, a través de películas,...

Nós na Biblioteca celebrámolo seguindo o noso lema deste ano "Fortes coma árbores". Coma a árbore que agromou hoxe na entrada do cole para presentar a MULLERES BRAVAS e loitadoras. Para apoiar as nosas lecturas bases do crecemento, da madurez, da igualdade, do respecto...

Contribuímos tamén co tema proposto para conmemorar esta data  "Igualdade de xénero hoxe para un mañá sostible", xa que dende aquí, todas e todos queremos colaborar coa loita contra o cambio climático e construír un futuro máis sostible para todas e todos.

FORTES COMA CARBALLOS

Boas amiguiños e amiguiñas!! Chegou o momento agardado. Cun pouco de pintura de cor azul e madeira fixemos un recuncho ben bonito para seguir co proxecto. A nosa árbore, o noso carballo xa preside a entrada do cole. Chama a atención xa así, sen máis. Pero esta árbore asentou as raíces e chegou para quedarse. Servirá de expositor para os nenos e nenas e os seus traballos.

Agradecer a Ensé, artesán local, facer realidad o noso soño. É evidente que non hai que ir moi lonxe para atopar o que buscamos. Valoremos os servizos que a contorna nos ofrece.

RECOMENDACIÓNS LECTORAS DO ENTROIDO

Ola amiguiños e amiguiñas!! Que gran festa a do Entroido!! E aínda quedan moitos días por diante. Para que gocedes do Entroido con festa e lectura, Darío, Izan e Cova de 2º achégannos unhas recomendacións lectoras. Non volas perdades!!

PENSANDO A ROSALÍA

Ola garabulliños e garabulliñas! Como xa sabedes, Rosalía amou a natureza galega dun xeito moi especial, tanto, tanto, que os seus poemas falan, moitas veces, das árbores e das flores que a rodearon dende que era unha meniña. Onte, polo seu día, quixemos honrar a súa memoria a través da súa flor favorita: os PENSAMENTOS. Cada aula plantamos catro pensamentos de cores: brancas, amarelas, violetas e granates para decorar as ventás da biblioteca. De hoxe en adiante, cada vez que vexamos as flores, lembraremos a nosa Rosalía.

DÍA DE ROSALÍA

Ola amiguiños e amiguiñas!! Xa chegou o "Día de Rosalía". Como cada ano conmemoramos esta data de distintos xeitos dentro e fóra da aula. Este ano decidimos facer un pequeno percorrido pola súa vida. Foron os compañeiros e compañeiras de 6º os que cun teatriño dirixiron a biografía da poeta e as demais aulas acompañámolos recitando algunhas das súas composicións máis famosas. O resultado foi fermoso, e asegúrovos, que ver como recitades os poemas pon a pel de galiña. Como premio unha boneca de Rosalía de minecraft para a aula e unhas fermosas pegatinas de Rosalía para todos e todas.

Gustouvos o vídeo. Queredes volver a velo?