Parabéns 9-03-2026

Ola amiguiños e amiguiñas!! Hoxe, dende a emisora de Radio Garabullo, volvemos a emitir para o comedor do cole. Da man de Martina, Mauro, Xoán e Guille de 5º continuamos cun 2º podcast de "Parabéns á hora de comer e as novas do tempo de lecer". Aproveitamos para felicitar o aniversario a todo o alumnado, persoal do centro e familias colaboradoras do comedor nados nos meses de decembro, xaneiro, febreiro e marzo. Queredes escoitalos?

CONCURSO PLÁTANO DE CANARIAS

Ola, amiguiños e amiguiñas!!

Xa comezou a 5ª edición da Liga Saudable de Plátano de Canarias, un torneo escolar, que combina aprendizaxe e diversión a través de aventuras educativas en formato escape room dixital.

Unha experiencia inmersiva,impulsada por Plátano de Canarias que invita a descubrir  que coidarse, alimentarse ben e consumir froita tamén pode ser unha gran aventura!

Para participar tedes que premer na ligazón do voso curso, poñer o voso número na aula e superar as distintas probas. Moita sorte!!

Enlace para 3º de Primaria:

Enlace para 4º de Primaria:

Enlace para 5º de Primaria:

Enlace para 6º de Primaria:

REPORTEIROS SD BANDEIRA

 Ola amiguiños e amiguiñas!!

Xoán, Vega, Hugo Fuentes e Hugo Otero decidiron converterse en reporteiros e reporteiras deportivas para contar o que pasa nalgún dos seus partidos.

Neste podcast comparten as xogadas, os momentos máis importantes e como se sentiron xogando en equipo.

Dádelle ao play e escoitade o seu traballo! 

Non é seu primeiro programa. O primeiro foi emitido para o comedor do cole e aquí o deixamos publicado.

202-04-2026: "Día Mundial de Concienciación sobre o Autismo"

Ola amiguiños e amiquiñas! Este ano, a asociación AÚPA DEZA quixo compartir connosco unha fermosa iniciativa para celebrar o Día Mundial de Concienciación sobre o Autismo.

Agasallaron ao noso centro cunhas chapas moi especiais, co obxectivo de dar visibilidade ao autismo e promover valores como o respecto, a inclusión e a empatía.

O alumnado participou con moita ilusión, levando as chapas e realizando fotografías mostrando así o seu apoio a esta causa.

Dende a BIBLIOTECA queremos agradecer este detalle, sumarnos a esta proposta e seguir traballando para construír unha escola máis inclusiva, onde todas e todos teñamos cabida 💙

VISITA DA NAI DE IAGO DE 4 ANOS

Ola amiguiños e amiguiñas!!

Esta semana tivemos unha visita moi especial na biblioteca do cole. A nai de Iago de 5º de infantill, achegouse para compartir con nós unha serie de experimentos sorprendentes e moi divertidos.

Os nenos e nenas puideron descubrir cousas moi curiosas: que lle pasa a un ovo cando o metemos en vinagre, como reacciona a pementa co xabón, por que a graxa nos axuda a manter a calor do corpo ou como poden cambiar de cor os caraveis. Todo isto a través da observación, o asombro e, sobre todo, a participación activa.

Foi unha experiencia moi enriquecedora na que aprendemos facendo, espertando a curiosidade científica dos máis pequenos e pequenas dun xeito lúdico e motivador.

Grazas Ana pola túa implicación, o teu tempo e as ganas de compartir con nós estes momentos tan especiais. Encántanos contar coa colaboración das familias para seguir medrando xuntos! 💙

A continuación, deixámosvos un vídeo resumo desta actividade tan especial.

COMEZA A SEMANA SANTA

Ola, amiguiños e amiguiñas!

Hoxe comezamos as vacacións de Semana Santa. Despois dun trimestre cheo de chuvia e cunha biblioteca moi concorrida nos tempos de lecer, a chegada da primavera trouxo consigo as ganas de xogar ao aire libre, deixando este espazo un pouco máis tranquilo.

Sen embargo, a actividade na biblioteca segue moi presente. Mentres nun recuncho os nenos e nenas de infantil xogan e experimentan, noutro o alumnado de 1º realiza o préstamo de libros para as vacacións. Ademais, o alumnado de inglés entra de cando en vez na procura dos “ovos de Pascua”, convertendo así a nosa biblioteca nun espazo vivo e cheo de aprendizaxe.

DÍA DOS BOSQUES con Wangari e as árbores da Paz

Ola amiuguiños e amiguiñas! Como xa sabedes o alumnado do 2º ciclo de Educación Primaria celebrou o Día Internacional dos Bosques cunha actividade vinculada ao proxecto de biblioteca do centro.

Dentro deste proxecto, continúan traballando na recuperación do espazo “O coto da Gaiteira”, destinado á plantación de diferentes especies arbóreas.

Para conmemorar esta data, prepararon a narración do conto Wangari e as árbores da paz, que compartiron co resto das aulas, transmitindo valores de respecto e coidado polo medio natural.

Seguimos medrando xuntos, coidando o noso entorno

Ola, amiguiños e amiguiñas!!

Que estará acontecendo no cole? Víchedes os carteis da entrada do cole? Que estará a psar?

Será que na clase de inglés algo se está a argallar… e a Pascua está a chegar….

Bblio Creativa: Formación con Alouette Machine

Ola, amiguiños e amiguiñas! Hoxe queremos compartir unha das actividades que vivimos na nosa biblioteca escolar, enmarcada dentro do noso Proxecto Documental Integrado (PDI).

O alumnado de 1º, 2º, 3º e 4º de Educación Primaria participou nun obradoiro de biblioteca creativa moi especial da man de Cristina e Jean-Ba, de Alouette Machine. Foi unha experiencia diferente, manipulativa e chea de significado, na que as nenas e nenos puideron achegarse ao mundo da imprenta manual.

Durante a sesión, descubriron como se elaboraban antigamente os carteis, empregando letras móbiles, tintas e prensas. Con moita ilusión e creatividade, foron creando as súas propias composicións, converténdose por un intre en auténticos impresores e impresoras.

O resultado deste traballo foi a creación de cartelería destinada a dous espazos moi importantes dentro do noso proxecto: o Horto e o Coto da Gaiteira. Deste xeito, a actividade non só tivo un valor artístico e manipulativo, senón tamén funcional, xa que as súas creacións formarán parte do día a día do centro.

Ademais, esta proposta permitiu traballar aspectos como a cooperación, a atención ao detalle, a expresión escrita e o respecto polos procesos tradicionais de creación, conectando o pasado co presente dunha maneira moi significativa.

Sen dúbida, foi unha experiencia enriquecedora que deixou pegada no noso alumnado e que contribúe a facer da biblioteca un espazo vivo, dinámico e cheo de aprendizaxes.

Moitas grazas a Cristina e Jean-Ba por achegarnos esta marabillosa actividade!

MULLERES GALEGAS QUE FAN CIENCIA

Ola amguiños e amiguiñas! A pasada semana no cole celebramos dúas datas moi importantes: o 8M, Día Internacional da Muller, e o 11F, Día da Nena e da Muller na Ciencia. Para unir estas celebracións creamos unha actividade especial dedicada ás mulleres galegas científicas.

O alumnado de 5º de Primaria investigou sobre diferentes científicas de Galicia que, co seu traballo e dedicación, están a contribuír a mellorar o mundo no que vivimos. Descubriron quen son, a que se dedican e por que o seu traballo é tan importante.

Con toda esta información elaboraron unha ficha resumida para compartir co resto do cole e axudarnos a coñecer mellor o papel das mulleres na ciencia.

No seguinte vídeo podedes descubrir algunhas destas mulleres galegas científicas e coñecer porque son tan importantes.

Agardamos que vos guste tanto como a nós!